اس دیارِ قدس میں لازم ہے اے دل احتیاط

اس دیارِ قدس میں لازم ہے اے دل احتیاط

( سید محمود اخترؔ کچھو چھوی )

اس دیارِ قدس میں لازم ہے اے دل احتیاط 

بے ادب ہیں کر نہیں پاتے جو غافل احتیاط 

جی میں آتا ہے لپٹ جائوں مزارِ پاک سے 

کیا کروں ہے میرے ارمانوں کی قاتل احتیاط 

اضطرابِ عشق کا اظہار ہو بے حرف وصوت 

اے غمِ دل احتیاط، اے وحشتِ دل احتیاط 

آبتائوں تجھ کو میں ارشادِ ’’او ادنیٰ‘‘ کا راز 

ان کے ذکرِ قرب میں لازم ہے کامل احتیاط

بس اسی کو ہے ثنائے مصطفی لکھنے کا حق 

جس قلم کی روشنائی میں ہو شامل احتیاط 

اس ادب نا آشنا ماحول میں اخترؔ کہیں 

رہ نہ جائے ہوکے مثلِ حرف باطل احتیاط

*****