خلق سے گر حیا کرے کوئی

خلق سے گر حیا کرے کوئی

(شیخ ابوسعید محمدی صفوی)

خلق سے گر حیا کرے کوئی

چھپ کے دل میں رہا کرے کوئی

پہلے خود کو فنا کرے کوئی

پھر خودی سے بچا کرے کوئی 

گر تکلم میں بھی تکلف ہے

مسکرا ہی دیا کرے کوئی

ہم تو خوئے وفا نہ چھوڑیں گے 

چاہے جتنی جفا کرے کوئی

ہم کسی سے جلن نہ رکھیں گے

لاکھ ہم سے جلا کرے کوئی

ہم نہ چھوڑیں گے یار کے در کو

لاکھ فتویٰ دیا کرے کوئی

مغفرت جس کو ڈھونڈ لیتی ہے

کاش ایسی خطا کرے کوئی

عشق کی داستانِ بے پایاں

وہ کہیں اور سنا کرے کوئی

جب کسی کی نہیں کوئی سنتا 

ایسی حالت میں کیا کرے کوئی 

کچھ اصول اور ضابطے بھی ہیں؟

یوں ہی مجنوں بنا کرے کوئی

جس کو نغمہ نہ راس آئے سعید

ایسے دل کی دوا کرے کوئی

*****