کیسے دیکھوں میں تجلیِ درخشاں کوئی

کیسے دیکھوں میں تجلیِ درخشاں کوئی

(شیخ ابوسعید محمدی صفوی)

کیسے دیکھوں میں تجلیِ درخشاں کوئی

نظر آتا نہیں کچھ یوں ہے نمایاں کوئی

جب نہ ہو سامنے روئے گلِ خنداں کوئی

کیا کرے دیکھ کے پھر صبحِ گلستاں کوئی

کس طرح دیکھے جمالِ رخِ خوباں کوئی

دشمنِ دیں ہے کوئی، آفتِ ایماں کوئی

شاخ لہرائی، کھلے پھول، چلی بادِ بہار

یوں نوا ریز ہوا مرغِ خوش الحاں کوئی

کس قدر شانِ کریمی ہے کہ توبہ کی جگہ

عصیاں کرتا ہے کوئی اور پشیماں کوئی

غمزہ و ناز کہوں میں کہ اسے عینِ نیاز

چھپ کے نظروں سے مرے گھر میں ہے مہماں کوئی

ایک ہی ضرب میں ہوجائیں صنم خانے تمام 

حق پرستی پہ جو آجائے مسلماں کوئی 

اہلِ تقویٰ ہیں سعیدؔ اپنے عمل پر نادم 

یوں لیے بیٹھا ہے رعنائیِ عصیاں کوئی

*****