دل پریشان ہے کیا ہونا ہے

دل پریشان ہے کیا ہونا ہے 

( اسیدالحق عاصم قادری بدایونی)

دل پریشان ہے کیا ہونا ہے 

غم کا طوفان ہے کیا ہونا ہے 

وقت کھیلوں میں گنوایا سارا 

اب پشیمان ہے کیا ہونا ہے 

کچھ بھی نامہ میں نہیں حسنِ عمل 

سر پہ میزان ہے کیا ہونا ہے 

شبِ تیرہ ہے مسافر تنہا 

راہ انجان ہے کیا ہونا ہے 

ٹوٹی کشتی ہے شکستہ پتوار 

موج طوفان ہے کیا ہونا ہے 

اے گدائے درِ غوث الاعظم 

کیوں پریشان ہے کیا ہونا ہے 

تیرا حامی، ترا ناصر، ترا غوث 

شاہ جیلان ہے کیا ہونا ہے 

لاتخف انی عزوم قاتل 

ان کا فرمان ہے کیا ہونا ہے 

غم کے سورج کی تپش لاکھ سہی 

ان کا دامان ہے کیا ہونا ہے 

خوجۂ ہند ہے والی تیرا 

پھر بھی حیران ہے کیا ہونا ہے 

آلِ احمد کی نگاہِ رحمت 

تجھ پہ ہر آن ہے کیا ہونا ہے 

غوث اعظم کی غلامی عاصم ؔ

اپنی پہچان ہے کیا ہونا ہے 

*****