رخ مہر ہے یا مہ لقا یہ بھی نہیں وہ بھی نہیں

رخ مہر ہے یا مہ لقا یہ بھی نہیں وہ بھی نہیں

(اسید الحق عاصم قادری بدایونی)

رخ مہر ہے یا مہ لقا یہ بھی نہیں وہ بھی نہیں

ہاں حسنِ روئے مصطفیٰ یہ بھی نہیں وہ بھی نہیں 

حسنِ دبستانِ جناں، نیرنگیِ کون ومکاں

گر وہ نہ ہوں جلوہ نما یہ بھی نہیں وہ بھی نہیں

ہے گلشنِ خلدِ بریں، یا مسکنِ روح الامیں

کاشانۂ خیرالوریٰ یہ بھی نہیں وہ بھی نہیں

تابانیِ دُرِّ عدن، رخشانیِ لعلِ یمن

دندانِ انور کی ضیا یہ بھی نہیں وہ بھی نہیں

تاجِ سرِ کسریٰ کہاں، پیشانیِ زہرہ کہاں

نعلینِ پاکِ مصطفیٰ یہ بھی نہیں وہ بھی نہیں

برقِ جلالِ کبریا، وہ لن ترانی کی صدا

بس آپ اور عرشِ علیٰ یہ بھی نہیں وہ بھی نہیں

اوروں نے جب نفسی کہا، اذھب الیٰ غیری کہا

تم نے کہا انی لھا یہ بھی نہیں وہ بھی نہیں

مستِ مےِ بغداد ہم، ہے غوثِ اعظم کا کرم

فکرِ الم، خوفِ بلا یہ بھی نہیں وہ بھی نہیں

ہادی سا استاذِ زمن، منظور سا شیریں سخن

تو عاصمِ مدحت سرا یہ بھی نہیں وہ بھی نہیں

طرزِ رضا کی پیروی، عاصم یہ تیری شاعری

حسنِ سخن، فکرِ رسا یہ بھی نہیں وہ بھی نہیں

*****