وہ مست ناز سروِ خراماں کہیں جسے

وہ مست ناز سروِ خراماں کہیں جسے

(شیخ ابوسعید محمدی صفوی)

وہ مست ناز سروِ خراماں کہیں جسے

ایسا حسیں ہے خسرو خوباں کہیں جسے

دیکھا ہے میں نے کوئے بتاں میں خدا قسم 

ایسا جمال مصحف قرآں کہیں جسے 

وہ پیکر جمال بصد ناز آ گیا

اتنا مرے قریب رگ جاں کہیں جسے

حاصل ہوا بتوں کی پرستش میں با خدا 

مجھ کو وہ کفر غیرت ایماں کہیں جسے 

بیٹھے نہ شیخ کیوں مری محفل میں باادب

کافر ہوں وہ کہ رشک مسلماں کہیں جسے

دیوانگیٔ عشق کی نعمت کا شکریہ 

مجھ کو دیا وہ جہل کہ عرفاں کہیں جسے 

مستوں کی اصطلاح میں ایماں ہے وہ سعیدؔ

کفر عظیم زاہد ناداں کہیں جسے

*****