اک طرف عشق کے بیمار خدا خیر کرے

اک طرف عشق کے بیمار خدا خیر کرے

(شیخ ابوسعید محمدی صفوی)

اک طرف عشق کے بیمار خدا خیر کرے

اک طرف حسن کی سرکار خدا خیر کرے

جس نے دیکھا تجھے اک بار خدا خیر کرے 

وہ ہوا تیرا پرستار خدا خیر کرے 

شیخ با جبہ و دستار خدا خیر کرے

رقص میں ہے سر بازار خدا خیر کرے

اک طرف حضرت یوسف کا جمال دلکش

اک طرف مصر کا بازار خدا خیر کرے 

بے خودی کہئے اسے یاکہ جنوں کی معراج 

سرہے اور سنگ در یار خدا خیر کرے

اک طرف شیخ کی فرسودہ بیانی توبہ

اک طرف ساز لب یار خدا خیر کرے

پھرہے باطل کی ہراک سمت اطاعت کا فروغ

پھر ہے منصور سر دار خدا خیر کرے

اللہ اللہ کہاں معرفت ذات وصفات

اور کہاں مجھ سا گنہگار خدا خیر کرے

جوبھی دیکھے سعیدؔ اس کو وہی اس کا ہو جائے 

ایسا ہے وہ بت عیار خدا خیر کرے

*****