جب تصور میں بسالیں آنکھیں

جب تصور میں بسالیں آنکھیں 

( اسیدالحق عاصمؔ قادری بدایونی)

جب تصور میں بسالیں آنکھیں 

ساری دنیا سے اٹھا لیں آنکھیں 

عرش پر ان کی سواری آئی 

حور وغلماں نے بچھالیں آنکھیں 

قدسیوں نے پئے دیدارِ نبی 

آبِ کوثر سے کھنگالیں آنکھیں 

دیکھ کر تابشِ انوارِ نبی 

ماہ واختر نے چرالیں آنکھیں

بحرِ رحمت میں تلاطم آیا 

جب ذرا ہم نے بھگالیں آنکھیں 

خاکِ طیبہ ہے خبردار قمر 

اس کی آنکھوں میں جو ڈالیں آنکھیں 

اے اجل شوق سے آجا ہم نے 

سبز گنبد پہ جمالیں آنکھیں 

حشر میں سامنے ان کے عاصمؔ 

شرمِ عصیاں سے جھکالیں آنکھیں 

*****