ایک زمین کئی شاعر {1}

ایک زمین کئی شاعر {1}

ــــــــــــــــ[میر تقی میر]ــــــــــــــــ

مِہر کی تُجھ سے توقع تھی سِتمگر نِکلا

موم سمجھے تھے تِرے دِل کو، سو پتھر نِکلا

داغ ہوں رشکِ محبّت سے کہ اِتنا بیتاب

کِس کی تسکیں کے لیے گھر سے تُو باہر نِکلا

جیتے جی آہ تِرے کُوچے سے کوئی نہ پِھرا

جو سِتم دِیدہ رہا جا کے سو مر کر نِکلا

اشکِ تر، قطرۂ خُوں، لختِ جِگر، پارۂ دِل

ایک سے ایک عدد آنکھ سے بہ کر نِکلا

=÷=÷=÷

ــــــــــــــــ[آل احمد سرور]ــــــــــــــــ

دِن ڈھلا شام ہُوئ سایوں کا لشکر نِکلا

ساری کِرنوں کا یہی ایک مقدَّر نِکلا

فِکرِ فن پُھولتے پھلتے ہیں تو تنہائ میں

کھو گیا بِھیڑ میں وہ گھر سے جو باہر نِکلا

اب تو وحشت میں ہی دیوانوں کا مِلتا ہے سکُوں

جِس بیاباں سے وہ گُزرا وہی اب گھر نِکلا

رائگاں لاکھ سہی پِھر بھی شہدیوں کا لہُو

آپ کے رنگِ حِنا کے تو برابر نِکلا

=÷=÷=÷

ــــــــــــــــ[احمد فراز]ــــــــــــــــ

مَیں تو مقتل میں بھی قِسمت کا سِکندر نِکلا

قُرعۂ فال مِرے نام کا اکثر نکلا

مَیں نے اُس جانِ بہاراں کو بہت یاد کِیا

جب کوئی پُھول مِری شاخِ ہُنر پر نِکلا

شہر والوں کی محبّت کا مَیں قائل ہُوں مگر

مَیں نے جِس ہاتھ کو چُوما وہی خنجر نِکلا

تُو یہیں ہار گیا ہے مِرے بُزدِل دُشمن

مُجھ سے تنہا کے مقابِل تِرا لشکر نِکلا